iss bhaid bhari chup main

Aey shama-e-kooyay jaanaan,
hai tez hawa, maana
lau apni bacha rakhna - raston pay nigah rakhna
Aisi hi kisi shab main
aayay gaa yahan koi, kuch zakhm dikhaanay ko
ik toota hua waada, mitti say uthaanay ko
Pairon pay lahoo us kay
aakhon main dhuwaan ho ga
chehray ki dararon main
beetay huay barson ka
aik aik nishaan ho ga
bolay gaa na kuch laikin, faryaad-kunaan ho ga
Aey shama-e-kooyay jaanaan
wo khaak basar raahi - wo sokhta parwaana
jab aayay yahan us ko maayoos naa lautanaa!
ho taiz hawa kitni, lau apni bacha rakhna
raston pay nigah rakhna - raahi ka pataa rakhnaa,
Iss bhaid bhari chup main ik phool nay khilnaa hai!
Uss nay inhi galyon main, ik shaks say milnaa hai!