Ik Karb Hai Aankhon Mein Ik Dard Hai Jeenay Mein

Ik Karb Hai Aankhon Mein Ik Dard Hai Jeenay Mein
Kya Ramz Hai Marnay Mein Kya Raaz Hai Jeenay Mein

Ik Jazba, Mastana, Ik Jur’at E Rindana
Is Ishq O Muhabbat Mein Is Zehr Kay Peenay Mein

Toofan Hai Jazbon Ka Sailba Hai Ashkon Ka
Ik Dard Ajab Sa Hai Sawan Kay Maheenay Mein

Kuch Tootay Hoye Sapney Kuch Roothay Hoye Apnay
Bus Is Kay Siwa Kya Hai Yaadon Kay Dafeenay Mein

Khamosh Bhi Rehna Hai Dukh Dard Bhi Sehna Hai
Aadab Hain Sab Shamil Ulfat Kay Qareenay Mein

Kya Lien Gey Tumhien Paa Kar Sahil Ki Traf Jaa Kar
Toofan Uthaya Hai Hum Nay To Safeenay Mein

Aey “Saad” Utha Us Ko Pehray Say Takhiyul Kay
Ik Saanp Hai Lafzon Ka Ma’anii Kay Hazeenay Mein