ab mere paas tum aayii ho to kyaa aayii ho?
maine maanaa ke tum ek paikar-e-raana’ii ho
chaman-e-dah’r meN ruuh-e-chaman-aara’ii ho
tal’at-e-mah’r ho, firdaus kii barnaa’ii ho
bint-e-mahtaab ho, garduuN se utar aa’ii ho
mujh se milne meN ab andeshaa-e-rusvaa’ii hai
maine Khud apne kiye kii ye sazaa paa’ii hai
Khaak meN aah milaa’ii hai javaanii maiN ne
shoala-zaaroN meN jalaa’ii hai javaanii maiN ne
shah’r-e-KhuubaaN meN ganvaa’ii hai javaanii maiN ne
Khvaab-gaahoN meN jagaa’ii hai javaanii maiN ne
husn ne jab bhii inaayat kii nazar Daalii hai
mere paimaan-e-muhabbat ne sapar (?) Daalii hai
un dinoN mujh pe qayaamat kaa junuuN taarii thaa
sar pe sarshaarii-o-ishrat kaa junuuN taarii thaa
maahpaaroN se muhabbat ka junuuN taarii thaa
shah’ryaaroN se raqaabat ka junuuN taarii thaa
bistar-e-maKhmal-o-sanjaab thii duniyaa merii
ek rangiin-o-hasiiN khvaab thii duniyaa meri
jannat-e-shauq thii begaana-e-aafat-e-samuum
dard jab dard na ho, kaavish-e-darmaaN ma’aluum
Khaak the diida-e-bebaak meN garduuN ke nujuum
bazm-e-parviiN thii nigaahoN meN kaniizoN kaa hujuum
lailii-e-naaz baraafgandah (?) niqaab aatii thii
apnii aaNkhoN men liye da’avat-e-Khvaab aatii thii
sang ko gohar-e-naayaab-o-garaaN jaanaa thaa
dasht-e-purKhaar ko firdaus-e-javaaN jaanaa thaa
reg ko silsilaa-e-aab-e-ravaaN jaanaa thaa
aah ye raaz abhii maiN ne kahaaN jaanaa thaa
merii har fat’h meN hai aik haziimat pinhaaN
har masarrat meN hai raaz-e-Gham-o-hasrat pinhaaN
kyaa sunogii merii majruuh javaanii kii pukaar
merii fariyaad-e-jigar doz, meraa naala-e-zaar
shiddat-e-karb meN Duubii hu’ii merii guftaar
maiN ke Khud apne mazaaq-e-tarab aagiiN kaa shikaar
vo gudaaz-e-dil-e-marhuum kahaaN se laauuN
ab maiN vo jazba-e-ma’asuum kahaaN se laauuN
mere saaye se Daro tum merii qurbat se Daro
apnii jurraat kii qasam ab merii jurraat se Daro
tum lataafat ho agar merii lataafat se Daro
mere va’ade se Daro merii muhabbat se Daro
ab maiN altaaf-o-inaayaat kaa sazaavaar nahiiN
maiN vafaadaar nahiiN, haaN maiN vafaadaar nahiiN
ab mere pass tum aayii ho to kya aayii ho?
0 Comments